महापौर महिला आरोग्य अभियान

"निरोगी सखी, राहील सुखी"

महापौर महिला आरोग्य अभियान हे पुणे महानगरपालिका (PMC) यांचे महिलांच्या सर्वांगीण आरोग्य संवर्धनासाठी राबविण्यात येणारे विशेष अभियान आहे. "निरोगी सखी, राहील सुखी" या संकल्पनेवर आधारित या उपक्रमाचा उद्देश पुणे शहरातील प्रत्येक महिलेला मोफत, सुलभ आणि गुणवत्तापूर्ण आरोग्य तपासणी सेवा उपलब्ध करून देणे तसेच आरोग्याविषयी जनजागृती करणे हा आहे.

या अभियानांतर्गत महिलांना विविध आरोग्य तपासण्या, तज्ज्ञ डॉक्टरांचे मार्गदर्शन आणि आवश्यक वैद्यकीय सल्ला एकाच ठिकाणी उपलब्ध करून दिला जातो. नियमित आरोग्य तपासणीद्वारे ॲनिमिया, मधुमेह, उच्च रक्तदाब आणि इतर आजारांचे वेळेत निदान होऊन योग्य उपचार मिळावेत, हा या उपक्रमाचा प्रमुख उद्देश आहे.

नागरिकांच्या सोयीसाठी ऑनलाइन नोंदणीची सुविधा उपलब्ध करून देण्यात आली असून, पुणे महानगरपालिकेच्या विविध रुग्णालये व आरोग्य केंद्रांमध्ये तपासणीची व्यवस्था करण्यात आली आहे. या माध्यमातून अधिकाधिक महिलांपर्यंत आरोग्य सेवा पोहोचविण्याचा प्रयत्न करण्यात येत आहे.

महिलांचे आरोग्य हे कुटुंब, समाज आणि शहराच्या प्रगतीचा महत्त्वाचा पाया आहे. त्यामुळे प्रत्येक महिलेला वेळेवर आरोग्यसेवा मिळावी, नियमित तपासणीची सवय लागावी आणि निरोगी जीवनशैलीचा स्वीकार व्हावा, यासाठी पुणे महानगरपालिका कटिबद्ध आहे.

"महापौर महिला आरोग्य अभियान – निरोगी सखी, राहील सुखी" या संकल्पनेतून प्रत्येक महिला निरोगी, आत्मविश्वासपूर्ण आणि सक्षम बनावी, हाच या अभियानाचा मूलभूत हेतू आहे.